Sa Libing

ni Noel Sales Barcelona

Ponebre ang hinga
ng amihan at habagat
(Ano’t dugo
Ang kulay ng palay sa linang?)
Ulinig ko ang panaghoy
ng mga damo at bulaklak.
(Bakit nga ba
Kilala at dayuhan ang pangalang tinatawag?)
Walong daan ang aandap-andap
na liwanag na tinakpan.
(Higit isang daan naman
Ang sinaklot ng kadiliman.)
Kailan matatapos
ang prusisyon ng mga bangkay at kabaong?
Ilang diwa pa
ang tatabunan ng lupa?
Kailan ang pagkaduhagi — hindi ang laya
Ang aakayin sa libing?